Шуурхай мэдээ
  Нүүр     Улс төр
35 тэрбумын хохирлыг хэн барагдуулах вэ эрхэм Ерөнхийлөгч өө!!!

Одоогоос яг нэг жилийн өмнө Ерөнхийлөгч Ц.Элбэгдорж гадаадын иргэдэд уучлал үзүүлж, эрх чөлөөтэй болгож байв. Тэдгээр нь “Саусгоби сэндс” компанийн захирал АНУ-ын иргэн Жастин Капла, ажилтан Филиппин улсын иргэн Кристобал Ж.Дэвид, Хилармон В.Кажуком нар.
 
Жастин Капла нар “Саусгоби сэндс” компанийг удирдаж байхдаа Монгол Улсад төлөх татвараас зайлсхийж, 35.2 тэрбум төгрөгийн хохирол учруулсан хэргээр хоёр шатны шүүхээс ял сонсоод байсан юм. Монголын цагдаа, шүүхийн байгууллага хоёр жилийн турш мөрдөн байцаах, шүүн таслах ажиллагаа явуулсны эцэст тэдний гэм буруутайг тогтоож ийн ялласан хэрэг.
 
Харин Ерөнхийлөгч Жастин Капла нарыг ялаас хэлтрүүлж, Монгол Улсад учруулсан хохирлыг “Саусгоби сэндс” компаниар төлүүлэх шийдвэрийг өнгөрсөн оны хоёрдугаар сарын 26-ны өдөр гаргаж байлаа.
 
Эл өдрөөс хойш нэг жилийн хугацаа өнгөрөхөд компани хохирлоо барагдуулсан эсэх нь бүрхэг хэвээр өдийг хүрэв. Бид энэ 'талаар тодруулахаар Шүүхийн шийдвэр гүйцэтгэх ерөнхий газарт хандахад тодорхой мэдээлэл өгсөнгүй. Тэгээд зогссонгүй. “Саусгоби сэндс” компанийн Хуулийн хэлтэст асуулга тавихад “Шүүхийн шийдвэрийг биелүүлнэ” гэхээс өөр тайлбар хэлсэнгүй.
 
Ийнхүү нэг жилийн өмнөх шүүхийн шийдвэр одоог хүртэл биеллээ олоогүй байна, Татвар, эдийн засгийн гэмт хэргийг шалгаж илрүүлэх хугацаа, зардал маш их байдаг. 35 тэрбумын хэргийг жил дамнан шалгаж илрүүлсэн цагдаа нар, энэ хэргийг хэдэн өдрийн турш шүүсэн шүүх байгууллагын ажил, түүнд зарцуулагдсан улсын мөнгө өнөөдөр ийнхүү салхинд хийсэх үү, Ерөнхийлөгч өө.
: 2016-02-25 16:23:16 : 605958

АНХААРУУЛГА: Уншигчдын бичсэн сэтгэгдэлд JIRGEE.mn мэдээллийн сайт хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 7000-1577 утсаар хүлээн авна.

Бидэнтэй нэгдэх