Өнөөдрийн мэдээ

Өмнөх мэдээ

Ч.Мөнхбаяр: Монголчууд аа, мөхөх гээгүй л юм бол сэрцгээ

-МОНГОЛ АХАН ДҮҮСТЭЭ ӨЧИХ НЬ-
 
461 дүгээр хорих ангид 109 дэх хоногтоо хоригдож байгаа Ч.Мөнхбаяр нийт Монголчуудад хандан ил захидал бичсэнийг бүрэн эхээр нь хүргэж байна.
 
Би үндэсний үзлээр 15 настай хүүхэд байхдаа өвчилсөн юм. Тэгэхэд би “Өвөр Монголыг чөлөөлөх үндэсний фронт” хэмээх нууц бүлгэмийг санаачилж байлаа. Тухайн үеийн миний зорилго Хиагтын шударга бус гэрээний үр дагаврыг арилгах, нэгдсэн Монгол Улсыг сэргээн мандуулах явдал байсан.
 
 
Тусгаар тогтносон Монгол Улсын иргэн би 53 настайдаа Монгол эх хэл бичгийнхээ төлөө, монголчуудынхаа эрхийн төлөө дуу хоолойгоо илэрхийлж тэмцээд “гадаадын тагнуул” гэж Монгол Улсын тагнуулын байгууллагад гүтгэгдэн, БНХАУ-ын эсрэг үйл ажиллагаа явуулсан гэж цоллогдож, Монгол Улсын прокуророос яллагдан цагдан хоригдож байна. Монгол Улсын Тагнуулын байгууллагын мөрдөн шалгах хэлтсээс зориуд санаатайгаар хуурамч баримт гэгчийг бүрдүүлж, эрээ цээргүй хилс хэрэгт намайг холбогдуулан хэлмэгдүүлж байна.
 
БНХАУ-ын эрх ашгийг хамгаалагчид Монгол Улсын төрд шургалсны улмаас эгэл жирийн сэтгүүлч би 100 гаруй хоног нийгмээс тусгаарлагдаад байна. 1990 оноос эхлэн монгол туургатны нэгдэл нягтрал, үндэсний үзэл түгэн дэлгэрч, 2000-аад онд Монгол үндэстний нөхцөл байдлыг сайжруулах санал санаачилгууд төрийн бодлогод ч тусгагдаж, Уугуулшууллын тухай хууль, Монгол Улсад гадаад дахь уугуул монголчууд буюу дэлхийн бүх монголчууд чөлөөтэй суурьших, уугуул мэт эрхтэй болох хуулийн зохицуулалтын асуудал ч хөндөгдөж эхэлсэн юм.
 
сонин mn
Үүний үр дүнд 2010 онд Япон улсаас өмнөд монгол тэмцэгчид, тэднийг дэмжигч япончууд ирж, Монгол Улс дахь өмнөд монголчууд ба тэднийг дэмжигч Монголын иргэдтэй уулзсан нь шинэ эргэлт болсон. Энэ уулзалтын үеэс эхлэн уг тэмцлийг идэвхжүүлэх үйл ажиллагаанд иргэний нийгмийн байгууллагууд оролцдог болсон. 2020 онд Өвөр Монголд монгол бичиг соёлыг ялгаварлан гадуурхахын эсрэг их тэмцэл өрнөж, өмнөд монголчуудын төлөөх тэмцлийг дэлхийн өнцөг булан бүрд идэвхжүүлсэн. Өмнөд монголчуудын үндсэн эрх зөрчигдөж, монгол хэл соёл үгүйсгэгдэж буйд дэлхийн монголчуудаас эсэргүүцлээ илэрхийлж байсан олон хүмүүсийн нэг нь би мөн.
 
Эрх чөлөөт Монгол Улсын иргэн миний хувьд манай улсын хилийн цаана сая сая монгол туургатнууд дэлхий дээр аж төрдөг, багагүй олуулаа гэдгээр бахархдаг хүн. Ийм учраас 2011 оны 1 дүгээр сарын эхээр БНХАУ-ын ЭСЯ, Сүхбаатарын талбай, Оюутны талбайд жагсаал цуглаан хийснээс хойш өдий хүртэл тэмцэл хөдөлгөөн тасалдаагүй үргэлжилсээр байна.
 
Хүний эрхийг хамгаалагчийн хувьд өвөр монгол хүн Монгол Улсын Үндэсний аюулгүй байдалд (ҮАБ) заналхийлэх санаа зорилго агуулах үндэсгүй гэж үздэг. Гэтэл Монгол Улсын Тагнуулын байгууллагаас “нууц” нэрийн дор БНХАУ-ын эрх ашгийг хамгаалж, монгол хүнийг /Мөнхбаяр намайг/ БНХАУ-ын эсрэг тагнуул хийлээ гэж захиалгаар, тусгаар улсад байж боломгүй, балмад, жигшүүртэй, гүтгэсэн үйлдлийг манай улсын тагнуулын байгууллагаас зохион байгуулсныг эрс эсэргүүцэж байна.
 
сонин mn
Иргэн Мөнхбаяр би гадаадын тагнуулын байгууллагатай хэзээ ч хамтарч ажиллаагүй, эх орон ард түмэн гэсэн үндэсний үзлээр төлөвшсөн, гадаадын тагнуулын байгууллагаас мөнгө төгрөг аваагүй гэдгээ энэхүү ил захидлаар албан ёсоор мэдэгдэж байна.
 
Мөн намайг хоригдож байх хугацаанд халуун дотно итгэл сэтгэлээр, өмгөөлж, хамгаалж, болзошгүй эрсдэлийг үл хайхран, талбай дээр зогсож, шүүхийн гадаа хүлээж, тагнуулын газрын дэргэд цуглаж, цахим болон хэвлэл мэдээлэлд үнэн бодит байдлыг ухуулж, таниулж ирсэн журмын нөхөд, үзэл бодол нэгтнүүддээ чин сэтгэлийн талархал дэвшүүлж байгааг минь хүлээн авна уу. Та бүхний минь надад хайрладаг гэгээн урам зориг аливаа бэрхшээлийг даван туулахад улам их эрч хүчийг өгч байна.
 
Монголчууд аа СЭРЦГЭЭ. Бид үзэл бодлоо чөлөөтэй илэрхийлж, улс орондоо сайн сайхан бүхнийг хүсч дуу хоолойгоо нэгтгэх боломжоо хором хормоор алдаж байна. Үнэлж баршгүй байгалийн баялагт маань шунасан эх орноосоо урвагчид төрийн нэр барин санаатайгаар бүрэн бүтэн эх оронгүй болгож, монгол хүний тайван амьдралыг сүйтгэж байгааг ухаарцгаа.
 
Монгол Улсын иргэн Ч.Мөнхбаяр /461 дүгээр хорих ангиас / 2022.06.02
 
Эх сурвалж: Өдрийн сонин 

Сэтгэгдэл бичих

АНХААРУУЛГА: Уншигчдын бичсэн сэтгэгдэлд JIRGEE.mn мэдээллийн сайт хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 7000-1577 утсаар хүлээн авна.

Оруулах

Сэтгэгдэлүүд

Одоогоор сэтгэгдэл бичээгүй байна.